الرجولة ع العروسة

الرجولة ع العروسة

بقلم/ اميرة محمد
من اول ماتسمع جملة احنا بنشتري راجل وانت لازم تعرف انه في حاجة غلط!!
بنشتري راجل ازاي ؟ وبكام؟ ومنين؟ !
منظومة الزواج في مصر والوطن العربي كله تعاني من الخلل ، يتخللها عادات وتقاليد عجيبة الشكل والملامح! وفي نفس ذات الوقت تلاقينا بنستقتل علي الحفاظ عليها !
ومن اهم تلك العادات والي بتنفرد بيها المراة المصريه او بمعني ادق تفرض فرضا جبريا عليها ، هي المساهمه في التاثيث ،، علي عكس بقية الدول العربيه! بحيث اصبح المفهوم ده بيتباع له اراضي ويتكتب وصلات امانه وكمبيالات من طرف اهل الزوجه عشان يجهزوا بنتهم ومحدش ياكل وشهم !
بقت مساهمه الزوجه فرض عين ! امتي وفين ؟! مش ده موضوعنا ، انما موضوعنا الرجوله نفسها بتبقي علي مين؟! الي خلانا نسال نفسنا السؤال ده مش ارتفاع نسب الطلاق ! خاصة عن طريق الخلع الي بتفتدي بيه الزوجه نفسها وتتنازل عن كافة حقوقها في سبيل اخلاء سبيلها من هذا العقد! الي خلانا نسال السؤال ده هو كم المسؤليات الي اصبحت ترمي رميا علي الزوجة!
اسباب الطلاق كتير بس ماراثون الزواج نفسه مابيستمرش الا بقوة تحمل الزوجه فقط مش الزوج!
مطلوب من الزوجه تكون 1600cc
زوجة باعمال الزوج !
اهم مطلب من متطلبات الزواج في الزوجه انها يكون عندها قوة تحمل !
تتحمل الاساءة وماتشوفهاش اساءة تشوفها محبه!
تتحمل الضرب وماتبصلوش علي انه اهانه او تحقير لا تبصله علي انه ضرب الحبيب زي اكل الزبيب! حتي لو مابتحبش الزبيب ولا فاهمه المثل نفسه اساسا!!
تتحمل دوشة الولاد (لوحدها)
تنحمل عصبيته منين مايحب يتعصب لاي سبب ان كان!
تتحمل تعليقات وتدخلات اهله في تفاصيل حياتها!
تتحمل تعليقاته هو علي اهلها ولازم تكون مؤمنه جدا براءيه بما انها ناقصه يعني وكدة!
تتحمل شغل البيت كله لوحدها!
ولو بتشتغل ومن اللهم احفظنا الي اسمهم المراة العامله يبقي تساهم بمرتبها في البيت انما هو مايساهمش بتقسيم شغل البيت او مسؤليات الولاد عشان الكلام ده بتاع الستات مش بتاع الرجاله هو كتر خيره جدا انه بيشتغل اساسا حد لاقي شغل وبيتجوز كمان الايام دي!؟
زوجه بعقد عمل مش بعقد زواج!
زوجه تنسي نفسها وتعيش انكار الذات طول الوقت !
شمعه تحترق من اجل الاخرين!
الاخرين الي بيبصولها نظرة الدونيه والي بيتبع معاها سياسات التقليل والتجحيم
، ومن ضمن المفاهيم المتبعه مع الزوجه انه الاقل اهتماما هو الاكثر سيطرة !!
واوعي تقولها كلام حلو لا تتمرع عليك او تركبك!
سم بدنها طول الوقت وهي تديك احسن ماعندها ! علي اساس انه مش هيجي يوم عليها وتكتشف اللعبه القذرة دي وتنفر منك ومن حياتها معاك! او خليها تسمعه من برة احسن يا فكيك!
وطبعا هو يسمع اي حد تاني كلام حلو غير مراته لانه معروف طبعا انها طارشه مابتسمعش من غيره مثلا!!
مفاهيم كتير اوي خربت بيوت ناس كتير ولسه مصممين عليها!
وبالتالي الزوجه التي لا تشعر بقيمتها مع زوجها او بمعني ادق الزوجه الي زوجها مالوش وجود في حياتها بتقدر تستغني عنه بلمح البصر! طالما هي بقت تشتغل وشايله مسؤلية بيت كامل لوحدها مع زوج بتلك المواصفات فابتبدا تشعر انه هو كزوج بدل ماهو عاءل انه عبء عليها وبالتالي بتتخلص منه،
البنت قبل ماتتجوز كانت عايشه بتاكل وتشرب وتنام وتتعلم ، فا المقبل علي الزواج عنده مفهوم انه هي هتنتقل من بيت ابوها وهو دوره ياكلها ويشربها ويكسيها بلقمتها! طب انت ايه دورك في حياتها؟! ايه حيوان منوي؟! بس كدة؟! كارثه لو ده كل مفهومك عن الزواج انه دورك انك تشتغل ثور في ساقيه برة وحيوان منوي جوة!
وطبعا لازم تعيش علي قده لان كل برغوت علي قد دمه ، انما في نفس الوقت هو ماينفعش يعيش علي قدها هي لان ذاته الرجوليه كانت تتطلب موديل وشغاله ودادة وماما وبابا في نفس ذات اللحظة دون ملل او كلل ! الرجوله اصبحت علي العروسه بحيث اتفرض عليها من البدايه التاثيث ، وبعدها اتفرض عليها الخدمة بالاجبار له ولاهله وللابناء ، اتفرض عليها لو اشتغلت تساهم في البيت ( هي ساعات بتعول الزوج نفسه) !!
فا لما تكون واحدة بتشتغل مثلا ومستقله ماديا والزوج مالوش قيمه فعليه او وجود فعلي في حياتها فا بتقدر انها تستغني عنه ! وما اكثرهم الي استغنوا عن ادوارهم كازواج واباء لاطفالهم !!
واصبح مفهوم الزواج والميثاق الغليظ عقد عمل مش عقد زواج ،والمسؤل الاول والاخير فيه هي الزوجه، اتفاق علي ماديات هتشيل فيها الزوجه النص تقريبا وكمان الاتفاق علي التحقير الضمني لكيانها ودورها وحصره في خدمه سعادة البيه ! وياريته بيطمر!
واكتر زوجه ناجحة تلك التي هي خرساء لا تتذمر، عمياء لا تري نقصانه، بلهاء تصدق اي حاجة منه ،حمولة تستحمله وقت عصيبته، واما يضربها تعتذر ولازم تعتذر من الشمخ الجواني والا الاعتذار مرفوض !
الي تتجوز تنسي انه لها اهل تنسي ابوها وامها واهلها وصاحباتها تنسي كل حاجة وتسستم حياتها عليه هو فقط ! سمعا وطاعة ،، وتستمر النطاعه !! الا ان ينحل العقد الزوجي وتبدا في مواجهه المجتمع الي بيحتقر المطلقه اكتر من المتزوجه ! وهاف فن يا مراة في العيش في هذا المجتمع الكيوت المحترم انسانيتك وكيانك المظبوط !
وتعالوا شوفوا الزوجات دلوقتي مسؤلياتها بقت اد ايه وبعدين اسالوا عن كونا مركز اول في الطلاق علي العالم .!! وانه بكترة المسؤليات والمساءلات ونسب المراة المعيله الي قربت علي 50% دي انه فعلا اصبحت الرجولة علي العروسه !

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

Powered by www.fagrelhoreya.com