أكتوبر 21, 2017

قناديل البحر خطرها وطرق الوقاية والحمايه منها

قناديل البحر خطرها وطرق الوقاية والحمايه منها

متابعة خالد عبد العزيز

قناديل البحر Jelly Fish موجودة في كل بحار الدنيا.. بنسب معينة..
أعدادها ممكن تزيد و بتنتشر لعدة أسباب.. أهمها إن “عدوها الطبيعي Natural predators” أعداده قلت من البيئة..

أول عدو طبيعي لقنديل البحر.. هو قنديل البحر.. أنواع قنديل البحر المختلفة بتفترس بعض.. مش كل قناديل البحر لاسعة.. في أنواع مسالمة بتفترس الأنواع اللاسعة..

ثاني أهم عدو لقنديل البحر هو سلحفاة البحر.. قنديل البحر بالنسبة لها وجبة شهية جدا.. بس سلاحف البحر أعدادها قلت جدا في البحر المتوسط و معظمها مات..

ليه سلاحف البحر ماتت؟ عشان الناس بترمي في المياه مخلفات وأكياس بلاستيكة.. و دي السلاحف بتاكل أجزاء منها أحيانا على إنها قناديل.. و بسبب دا بتموت..

صيد سلاحف البحر ممنوع.. بس في ناس بتعمل الممنوع دا في السر.. و بتبيع لحم السلاحف اللي بيعتقد خطأ إنه مقو جنسي.. كمان في ناس بتشرب دمها عشان وزنها يزيد..

باقي أعداء القنديل هم سمك التونة و سمكة أبو سيف و بعض القروش.. الصيد الجائر بيقلل الأنواع دي و تنتشر القناديل..

– قناديل البحر بتظهر كمان لما بنرمي بواقي الأكل في المياه.. و دا بيخليها تقرب من الشط…

– البحر المتوسط مفيهوش أنواع قاتلة من قنديل البحر.. و أخطر نوع فيه اسمه “قنديل البحر المكعب Box jellyfish” أو ساعات بيسموه “دبور البحر sea wasp”.. و الأنواع الموجودة منه في البحر المتوسط مش شديدة الخطورة..

– لسعة قنديل البحر خطورتها و شدتها بتتراوح حسب سنك و حالتك الصحية و حجم القنديل.. أكثر الناس تعرضا للخطر هم الأطفال اللي حالتهم الصحية سيئة..

– القنديل ممكن يلسعك و هو ميت ومرمي علي الشط برا المياه.. لو دست عليه أو مسكته.. لأن القنديل مش بيبصق السم.. القنديل فيه لواسع و إبر دقيقة آخرها منتفخ و فيها خلايا بتحقن السم.. لو دست عليها أو مسكتها حتخترق جلدك و تلسعك..

تعمل ايه لو شفت قنديل جنبك و أنت بتعوم.. أو لسعك بالفعل؟

– أخرج من المياه بهدوء قدر الإمكان.. قنديل البحر مابيشوفش و معندوش أصلا عيون ماعدا دبور البحر.. و حتى دا.. عيونه الـ24 بتخليه يميز بس الضوء و الألوان..

يعني هو مش شايفك.. بالتالي هو بيعتمدعلي حركتك و الذبذبات اللي بتنقلها في المياه عشان يحس بالخطر منك و يهاجمك..

– بلاش تلمس أو تهرش موضع اللسعة..

– حط خل على مكان اللسعة فورا لمدة 30 ثانية.. الخل هو المستحضر الوحيد اللي متفقة عليه جميع المراكز الصحية في العالم لعلاج لسعات معظم القناديل..

– بعد الخل.. حاول تدقق في الجلد و تشوف لو في أي ابر أو لواسع من القنديل لازقة في جلدك.. و شيلها بالراحة و بهدوء بالملقاط.. لو مفيش ملقاط.. احلقها بماكينة حلاقة بلاستيك جديدة.. و كرر بعدها حمام الخل..

هرش اللواسع دي أو محاولة انك تشيلها بايدك.. حيخليها تطلق سم قنديل أكتر في مكان الإصابة.. حتى و هي بعيد عن جسم القنديل..

– اتخلص من اي حاجة استعملتها في التعامل مع لسعة القنديل.. زي ماكينة الحلاقة أو أي فوطة..

– بعد ما تتخلص من اللواسع.. اغسل المكان بالماء الساخن الل تتحمله و مايحرقش جلدك..

– ماتسعملش ماء عذب لغسل اللسعة.. القناديل معظمها بيعيش في البحر.. و أي تغيير في ملوحة المياه حيخلي اللواسع الباقية علي جلدك تطلق مزيد من السم.. اغسلها بمياه البحر..

– تجنب موضوع معالجة اللسعة بالبول و الكحول.. دي خزعبلات أفلام و بتزود الألم..

– ماتربطش مكان اللسعة..

– لو المصاب أقل من 3 سنين.. اعمل له حمام الخل.. و شيل اللواسع من جلده.. و اذهب بيه فورا للطبيب..

طيب إيه الحل لو اللسعة جت في العين أو بالقرب منها..؟

متدلقش خل في عينك.. ماتدعكش عينك..

غمض العين الملسوعة من غير ضغط و سيب جزء بسيط من الجفن مفتوح للدموع تخرج و حط فوقها من غير ضغط قطنه كبيرة مبللة بمياة البحر.. و روح فورا لأقرب طبيب.. هو بيشيل اللواسع و يتصرف..

– لو بعد العلاج الموضعي..حسيت بألم أو التهاب.. استشر الطبيب..

– لو حسيت بأي تفاعل من تفاعلات الحساسية.. زي الإحمرار و الحكة و ضيق التنفس.. لف المصاب و دفيه و خليه يقظ و احميه من الصدمة.. و روح بيه فورا لأقرب مستشفي..

– لو بعد العلاج مكان اللسعة لسه بيوجعك.. أطلب من الطبيب يوصفلك مسكن مناسب لحالتك الصحية..

– لو صادفت قنديل ماتعرفش نوعه ماتحاولش تقتله.. لأن دا ممكن يكون نوع مسالم بيفترس الأنواع اللاسعة.. سيب الطبيعة توزن نفسها بنفسها…

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

Powered by www.fagrelhoreya.com